مَشّي يَ كِلْمي نْروح عَ الْبَتْرون

مَشّي يَ كِلْمي نْروح عَ الْبَتْرونْ

الْبَتْرونْ وِحْياة الشِّعر بِتْمونْ

الْبَتْرون لَوْ زِرْتا بِنُصّ اللّيلْ

بِتْشوف نور الشَّمس بِالْبَتْرونْ

يَلّا يَ كِلْمي نْروح عَ الْبَتْرونْ!

وْمِنْ بَعدْ ما نِمْشي هَكِ الْمِشْوارْ

نْشوف بْعِينَيْنا الْكَون غَطّ وْطارْ

وْمِنْ قَبلْ ما يِتْفَتَّقو الْأسْرارْ

نْشوف شْرايين الْقَلبْ صارو عْيونْ

وْنِتْعَرَّف مْنِ جْديدْ عَ الْبَتْرونْ!

شَمْس الْقَصيدي عَتَّم الْقَنْديلْ

وْخَصْر الشِّعر بِاللَّيل صار يْمِيلْ

وِالنّاس تِتْهافَت تْحُطّ تْشيلْ

وْتُرْقُصْ قَوافينا عَ لَحْن جْنونْ

وْتُغْمُرْ قَصايِدْنا سَما الْبَتْرونْ!

وْإشْرَبْ حِبرْ آكُلْ وَرَقْ إحْكي

يْغَنّي الْحَرف أرقُصْ مَعو الدَّبْكي

وْإرْجَعْ عَ وَرْقا إرْسُم الضِّحْكي

وْيِبْقى الْحَرف بِضْلوعْنا مَسْكُونْ

غامِرْ غُصنْ لَيْمونْ بِالْبَتْرونْ!

كُوني الْأنا وْشيلي الْأنا مِنّي

جِنَّيت بِحْروفِكْ مَعي جِنّي

بْتِبْقي حَدا مِنّي خِلِقْ عَنّي

وْبِبْقى مَعِكْ طول الْعُمرْ مَ بْخونْ

عا شَرطْ تِبْقي ساكْني الْبَتْرونْ!

مَجْنون ما بَدّي حَدا حَدّي

رايِحْ تَ إخْلَقْ مِتل ما بَدّي

رِدّي يَ كِلْمي عِطْرِكْ وْرِدّي

وْلَوْ كان يَلْ عَمْ يِنْدَهِكْ مَجْنونْ

وْمَشّي مَعي تَ نْروح عَ الْبَتْرونْ!

جايي وْمَعي يِهْدُرْ مِتلْ شِلّالْ

هاك الْحَكي وْما يِنْحِبِسْ بِخْيالْ

وْصَوْب الْمَدا مِدُّنْ إِدَيْن الْبالْ

قَطِّف نْجوم وْضَيِّف الْحَسّونْ

وْإِسْمَعْ شِعرْ مَ نْقالْ بِالْبَتْرونْ!

ما عاد بَدّي مْنِ الدِّني إِلّا

شُوف الْحَرفْ وِسْع الدِّني كِلّا

وْأُغْمُر الْكِلْمي وْإِسْكَر وْقِلّا

مَطْرَحْ مَ بَدِّكْ تِسكْني رَحْ كُونْ

وْغَمِّض عْيوني وْضِيع بِالبَتْرونْ!

الْكِلْمي وَطَنْ عَمْ بِرسْمو بْإيدي

بْتُولَدْ مَعي مْنِ الْآخ تِنْهيدي

مْنِسْكَرْ سَوا وِمْعَتَّق نْبيدي

وِبْعيش عُمْري لِلْحِبرْ مَدْيونْ

وِبْشُوفْ كِلّ الْ كِلّ بِالْبَتْرون!

وْكِلْما الْحَكي يِدْلُقْ وَحي عْلَيْنا

وْتِسْبَحْ بِبَحْر الشِّعْر عِينَيْنا

بِالرّابْطا بِتْصيرْ إيدَيْنا

تُحْصُدْ صَدا الْأحْلامْ بِالْبَتْرونْ

يَلّا سَوا تَ نْروح عَ الْبَتْرون!!!

إفتتاح شهر نوّار الثقافي ـ مركز الرابطة ـ البترون.  

 جان سَمراني