يا رب ما بقبل برتبة فيلسوف
ما زال إنت خلقتني شاعر ذكي
وبوجود أهل الذوق قررت الوقوف
أتنشق وأتمون العطر الذكي
وبوجود أقلام الوحي وكل الضيوف
ودكتور عماد الصان حُرم المملكي
وبوجود دكتور حايك بكل الظروف
فكارو على نول الحقيقة محَيَّكي
يا رب عّم ناديك قدام الألوف
يا رب إلا لعُظمتك ما بشتكي
ومن بعد مطران الحكي وشيخ الحروف
كيف بدّي بَلِّش وكفي الحكي
بأسم النقابة جيت حَيي هيك دار
وحيي القداسة وخبّر الشعب الأبي
وخبر رئيس الأُنطش التوبو وقار
يللي بدير الطهر والعفة ربي
نحنا النقابة ما منبعت أعتذار
بقلب الحدث منكون قُدوة ومرتبي
ووين ما انعمل توقيع بيكون القرار
نشوف الكتاب معربَش على المكتبي
ووين ما انعمل حفلة شعر بهالديار
منضَلّنا حُرّاس قصر الموهبي
ووين في دموع وحزن ما بدها حوار
منكون حد رفاقنا وما منختبي
ووين في فرح أو عرس منخلي الجرار
تعرق قوافي بعرس قانا حوربي
ووين ما الصبايا بيقطفوا أجمل قمار
ووين ما التقوا خيرة شباب الطيبي
ووين في ثقافة وفلسفة وسهرة كبار
بدها النقابة تضلها أم الصبي
ندوة لقاء بأرض جونية محلها
وهيك ندوة مين ما بيجلها
لكن الليلة جبيل فيها اْنقام عيد
حتى القصيدة حقوقها توصلها
جبيل فيها الحرف عّم يعرق نبيد
جبيل صارت موهبة عا حلها
جبيل كلما بينعَزف فيها النشيد
لجونية حبيبة قلبنا منقلها
وين في لقاء وشاعر وكلمة وقصيد
الحجار بتزَهّر قوافي كلّها
في بي شُغلو الكنفشة وشوفة الحال
بيورت ولادوا المشاكل والدِما
ويونس في عندو ولاد شمختهٌن جبال
رَبّاهٌن وعلَمهٌن يصونوا الحما
دكتور عماد بهالدني إلنا مثال
بحضن الأدب والفلسفة كتابو اْرتما
وأستاذ عصام بيرسُم بيوت الجمال
بالهندسة والصُدق عا بيو اْنسما
ودكتور جهاد اللي تعَلَّم بالحلال
بالطُب فاق معدلو وقدرو سما
والفرق واضح يا صحابي بهالمجال
بين بي ما بيعرف سما بالأنتما
وبين بي عاطي للدني أشرف رجال
بتضَلّ مفتوحة إلو بواب السما
يا عماد بيّك ما عرفتو عن قريب
بحشريتي أخبار عنو صرت جيب
بضيعة فغال تفاخروا بسيرتو
وبجبيل عرفوه المهَذّب والأديب
بسلك الجمارك كان صاين ديرتو
وكان الأمين الصادق وأوفى رقيب
وحكامنا لو يوم عاشوا بجيرتو
عِديٌن أمانة كان بالظرف العصيب
عِديٌن كرامة واْستحوا من غيرتو
ويللي استلموا حدود لبنان الحبيب
لو ياكلوا لقمة وفا من خميرتو
ما تسَرّب على بلادنا زوان الغريب
ببيَك يا خيي عماد بتعَلي العتاب
فَضلو عليك بهالدني من بدَايتَك
أنت المحبة والوفا بين الشباب
العز الأصالة الصُدق حكيوا حكايتَك
اْعذرني اذا بحاكيك قدام الصحاب
بكتاب بيّك ما تعلي رايتَك
لبيَك طبعت كتاب وعملت الصواب
تا تكرّمو وبعرف طهارة غايتَك
لكن اذا مع بيك عملت الحساب
بَدّها الحقيقة تبَيّن على مرايتَك
أنت صرفت كم شهر تا عملت الكتاب
وهُوِّي صَرَف عُمرو على تربايتَك
