لبنان يا بَيّ الدني الأكبر
بالعلم والأبداع متجلى
بصَلّي تا يبقى أرزك الأخضر
شايف بحالو عا الدني كِلا
ما في حدا عن بيّنا سئلان
عنَّك..الطيش مرافق الخِفّي
منزحَف..نلَبِّس حالنا أوطان
التوب العياري كيف بيدَفّي؟؟
بتغشّ حالَك ما حدا زَيَّك
بتنغَرّ أنَك صاير مْدَيَّك
وبتقول ما بَدِّي بقى بَيي
وعا التَذكرة ما بينمحى بَيَّك!!!
لبنان بَيَّك روق يا محموم
بزنود حَيلَك سَنّد عمادو
ولو كنت عا بلاد الغرب معزوم
والشرق دِعيَك يوم ميلادو
ما تفرَح وتسكَر بغير كروم
كرامة أبن لبنان ببلادو
وبُكرا يا بَيّ الكل رح بتقوم
من قبر طَيش الحقد ورمادو
ولبنان يا صحابي بوجه عموم
عناد الدني ما لَيَّن عنادو
ولا تحلَموا ممكن وطنا يدوم
عَنّو أذا بيتهَجروا ولادو
