قصيدة للغناء
لا تْشَحّدونا المِلحْ لا
شَـحّدونا وطَنْ
ما بَدْنا الْكَراسـي لا
عَ حْساب الوطنْ
الوَطَنْ رَحْ يِفْلِتْ مِنْ دَيْكُنْ
وْبِتْروح عْلَيْنا وِعْلَيْكُنْ
وْبِيضيع الْكَون بعيـنيكُنْ
وِبْيِفْنى الزَّمَنْ
لا تْشحّدونا الملح لا
شَـحّدونا وطَنْ
جِعْـنا وِنْفَخْتِتْ هالْجَيْبي
ووِقفِتْ هَالأشْـغالْ
وْصِرْنا لَمّا فْقَدْنا الْهَيبي
صفرٌ عَ الشّـمـالْ
وْما نْسينا مِنْ بعد الخَيبي
الزَّعيـم اللّي قـالْ
ديروها شْحادي مِشْ عَيْبي
شـحادي بِالْعَـلَنْ
لا تْشحّدونا الملح لا
شَـحّدونا وَطَن
كِلْمِنْ بَدّو بْلادو حُرّه
وْبَدّو الإسْتِـقْلالْ
لكِنْ إشارا مِنْ بَـرّا
ناطِرْ مِنْ مِرْسـالْ
وْدَوْلي لا نَقْشي وْلا طُرّه
ومَجْلِسْ فاضي الْبالْ
وْنِحْنا عَمْ ناكِلْها مُرّه
وعَمْ يِفْضى الْوَطَنْ
لا تْشحّدونا الملح لا
شَـحّدونا وَطَنْ
شعر وموسيقى: جان سمراني
