بعيد الأم بِهديكن قصيدة ماما وبتمنّى طول العمر للإمّات لْ بعدن معنا…. والرحمي لَيَلّي تركونا وْفَلّو….

ما في حَدا إسْمِكْ نِسي
ماما يَ أوّل مدرسي
إسْمِك على رغيف الْعُمر
عَطْفِك يَ عينيّي غُمر
عُمْرو بِعُمرو ما قِسي
ما في حَدا إسمِكْ نِسي

إنتِ القمر فيكي انْجَلا
إنتِ الحلا كل الحلا
صَوتِك بِدينَيّي صلا
غَلْغَلْ بِأحْلامي وْرِسي
ما في حَدا إسْمِكْ نِسي

صوتِكْ هَمس جِرح القَصبْ
صَوتِك نَغَم فِيّي انْسَكَبْ
نُورِك وَهج عُمْر انْكَتَبْ
كِلّ الْحَلا عُمْري كِسي
ما في حدا إسْمِكْ نِسي

جان السمراني