يسعد مساكم خير يا خلان بهالطقس فيكم جونا مأنوس
وجودكم للنثر والقصدان بقيمة وجود الزيت للفانوس
بوجود سيدنا التقي الملفان الوجَّه خُطانا لجنِّة القدوس
وحضرة مديرالعام عالي الشان الراعي لمنهج تربوي مدروس
وبوجود مديرالاوادم جان البمْقام خَي بلا سِجل نفوس
وبوجود عيسى مطبِّب الانسان لوجه الله، وعالمرض كابوس
وبوجود نواب الحِمى واخوان وصاحب سماحة وجيشنا وقسوس
جيتْ احكي. والقلب فرحان وبالشعر تا اترك اثر ملموس
راجعتْ مطلق عالِم وفنان وغيّبتْ ستعشر الف قاموس
وطالعتْ كل البلزجل فرسان وانجيل والقرآن والناموس
واليازجي والاخطل وجبران وجمَّعت زادي وجيت تا احكي
لعيون طنوس وابو طنوس
طنوس بيَّك من قبل ما راح كنا بصرحو استقدم الاتراح
ومني طلبْ في يومها، ووصى ارثيه لو غاب بدني الارواح
بالجود بيَّك كان الو خصة وبابو بلا مفتاح في هالناح
وبعدو، ولا منكم حدا تقصى ولا فتَّشِتْ امك على المفتاح
ووقت الوبا راح وترك غصة وما قدرتْ ودعتو بشِعر فوّاح
لكنما ما انتهيِت القصة بتكريمَك استقدمتْ امضى سلاح
وجايب الَك من منتجي حصة انشالله بتكريمات هالعيلة
ما منحكي غير بالافراح
واستاذ طنوس الانتْ معروف بأفضل مربي، وهيك متربي
وغلة عقود صرفتها وشهور بموقع مدير وصلتْ للقِبة
لولا بكلمة، قلتْ لكْ مشكور ما بتنوفى عا جهود منكبي
من هيك بدي اشكرَك بشعور دقات قلبي الخافقة بعِبي
الاستاذ بالتعليم حتى يغور بدو نفَس من فايض الربي
الاهل عا اولادهم بالدوُر بعصبوا وبكَيْلو مسبة
لكن عليهم انت ما بتفور ولا بعنف بتعامل ولا بهبة
وكل طالب بيوصل شكل مفطور هيدي شقا، هيدا غبا معبي
بالمدرسة عليهم انت بتدور بتغدَق ابوِّة وعطف ومحبة
وبتبلش تهيي بأرض البور وتزرع قيم حبة ورا حبة
ومن بعد ما تجبل مواد النور بتقولب الطالب بِخُلق وعِلم
بيرجع لبيتو بكامل الصبّة
ومطلق مربي للتقاعد مال شو حجم انتاجو بعد كدو ؟
بيتكرَّم بحلوى وحكي بينهال وبِنال درع وبَوْس عا خدو
لا صروح شاد، ولا اقتنى اموال ولا ضَب مونة فوق ما بدو
من جديد بدو يمتهن اعمال تا يعيش يومو ويئتمن غدو
لازم الدولة تحسَّن الاحوال للي حواسو وكاهلو انهدو
وما تتركو عرضة لسوء الحال يبيع تا يحيا، ارض جدو
لكن منين بينَّنصف ما زال الحامي حرامي وما حدا ردو
عا كل حال بمتن هالاقوال برجع لوضع معلم بودو
عا بيدر العمر ان جمعنا غلال وعَدْ كل عامل جنى يدو
بين المربين بشكل اجمال وبين سائر الاعمال شو عَدو
شفنا الفرق ظاهر بهيك مجال هوديك بِعدوا بِنا وفلوس
وانتو شباب الغد بتعدو
وغزة البلإجرام محمومة واليوم طعمة مَيها مزة
كل الدول بالكون ملزومة تكمش الوحش وتربطو برزة
وشعبنا بوقفات معلومة نحنا جنب غزة بهالحزة
بس المصيبة بأرضنا البومة من شطوطنا للارز مندزة
فقر، وغلا، واشغالمعدومة وكل مشرق العملة لها فزة
وقلة ،ودواير شبه مسمومة وما في أَجر بيعيِّش بعزة
ولا كهربا، وافواه مكمومة وفوضى وبلا، وتجار مبتزة
وإذن السياسيين مصطومة وزمَّارة الدستور منحزة
وما دام عِنا الناس محرومة بغزة ما فينا نساهم بغزة
وتا ما الحالة تضل مأزومة ونقوى، وما نبقى رياش مهتزة
انتخبوا رئيس وشكلوا حكومة وخلوا البلد ينهض، وساعتها
منهجم عا غزة وما بعد غزة
الشخص البِعمرو كافح وضحّى وصالح عطي للمجتمع عالحل
بيترك نتايج ما بتتمحى وبتشع متل الشمس لما تطل
استاذ إسمع، دعوتي مْلحة الانسان لولا ما اشتغل بِمل
القانون إن خلاَّك تتنحى ومن كنف خدمة تربوية تفل
ما دام باقي العقل والصحة بميِة قصة بتربط وبتحل
وما دام بالخبْرات متلحى في مرجع، وشورى، ورأي صايب
منريد ما تتقاعد من الكل
الشاعر فراس انيس الفغالي.
